Appendix 5: Four Versions in Jèrriais1
© M. J. Grant, CC BY-NC 4.0 https://doi.org/10.11647/OBP.0231.17
1. Version by Ph’lippe Langliais (died 1884)
Oubllierait-nou ses viers accoints
Ses anmins, ses parens?
Oubllierait-nou ses viers accoints
Les jours du vier temps?
Chorus:
Pour l’amour du vier temps, allons,
Pour l’amour du vier temps,
J’bérons ensemblle ocouo, j’bérons,
Pour l’amour du vier temps.
Par les côtis j’avons couoru,
De belles flleurs cuillant;
Mais j’avons travailli bein du
Depis l’vier temps.
Chorus: Pour l’amour du vier temps, allons …
Nouos deux j’avons jouè l’long des doûts
D’solèi l’vant à couochant;
La mer a ronnè entre nous
Depis l’vier temps,
Chorus: Pour l’amour du vier temps, allons …
Ne v’là ma main, man vier garçon,
Et la tqienne je prends;
De bouan coeu j’nouos divertirons
Pour l’amour du vier temps.
Chorus: Pour l’amour du vier temps, allons …
De convier tu ne r’fus’ras pon,
Bein seux j’en f’rai autant;
J’bérons ensemblle ocouo, j’bérons,
Pour l’amour du vier temps,
Chorus: Pour l’amour du vier temps, allons …
2. Version by John D. Hubert (1895)
Oublié thious les viers anmins,
Et toutes nos boûones viels gens?
Oublié thious les viers anmins,
Et l’amour du vier temps?
Chorus:
Et tout chu bouan vier temps,
Le bouan vier temps.
J’béthons une fêt mon vier garçon
En mémouêthe du vier temps.
J’avons té à la plîse ensemble,
Y-ya pus d’quarante ans,
Remplie ta mogue man vier garçon,
Comme dans chu bouan vier temps.
Chorus: Et tout chu bouan vier temps …
Donne mé ta main man vier garcon,
Y-ya du Jerriais là d’dans.
Une bouane pouognie man vier garçon,
Pour l’amour du vier temps.
Chorus: Et tout chu bouan vier temps …
3. Version published in Nouvelle Chronique de Jersey, 15 November 1902
Pour l’amour du vièr temps, garçons,
J’m’adresse à touos Jerriais,
Arm’ous dé pliummes ou bein d’crèyons
Et rimèz en patoiès.
Chorus:
Pour l’amour du vièr temps, allons,
Pour l’amour du vièr temps.
Une pliummée d’encre oquo prenons
Pour l’amour du vièr temps.
Pour l’amour des bouans temps d’aut’fais
Dé vot’ langage rapp’lous,
N’ayis pas d’honte du vièr patoiès,
En Jerriais rimèz tous.
Chorus: Pour l’amour du vièr temps, allons …
Pour l’amour du vièr temps, garcons
R’souvnous d’not’ almanâ
Envièz-nous rimes, vers et chansons
Qué l’monde rie à ha-has.
Chorus: Pour l’amour du vièr temps, allons …
Pour l’amour du vièr temps; si’en cas,
S’ou z’êtes d’esprit rassis,
Ecrivez nous, j’n’les r’fusons pas,
D’belles sérieuses poésies.
Chorus: Pour l’amour du vièr temps, allons …
Pour lé bouan vièr temps, m’est avis,
Mesdames, que vous ètou
Pouorriez nouos dounner sign’ de vie...
N’laissiz pas l’s’hommes faithe tout.
Chorus: Pour l’amour du vièr temps, allons …
Pour l’amour du bouan temps jadis
Rapp’lèz toutes vos idées;
Mais dépêchous, jé vouos en prie,
Pas un moment n’perdèz.
Chorus: Pour l’amour du vièr temps, allons …
Pour l’amour d’aut’fais, êcrivèz
Mais qu’dans vos vers n’y’ait rein
Partchi autchuns s’saient offensés;
Dé chonna gardous bein.
Chorus: Pour l’amour du vièr temps, allons …
4. Version by Mathilde dé Faye, “Georgie”2
*Jamais n’ou n’pouora oublié,
Les jours de ses jeunes ans;
Quand n’ou ’tet d’giées comme des peinchons;
Les jours de ses jeunes ans.
Chorus:
Pour l’amour du vieir temps, chantons,
Pour l’amour du vieir temps,
J’nos entre donnons eunne poiegnie d’main,
Pour l’amour du vieir temps.
Quand n’ou couothait dans les valleaies,
Dans les près, sus les haies,
Dans les kios parsémeais de fieurs;
Comme dans le bouan vieir temps.
Chorus: Pour l’amour du vieir temps, chantons …
J’oublîethons t’y nos vieirs anmeins?
L’zanmeins de nos jeunes ans;
J’oublîethons t’y nos vieirs pathents?
Les gens du bouan vieir temps.
Chorus: Pour l’amour du vieir temps, chantons …
*J’avons souvent couothu ensembyïe;
En chantant et riant,
Et j’avons travailli bein du,
Depis chu bouan vieir temps.
Chorus: Pour l’amour du vieir temps, chantons …
J’soauticotaîmes le long du qu’mein,
En allant à l’êscole,
Et j’èrvenaîmes contents au sai.
Quand l’soleit se qu’ouochait.
Chorus: Pour l’amour du vieir temps, chantons …
La leune s’est leveaie bein des fais,
Et le soleit étout,
Et les aîstelles ont aîskiéthi,
Sus l’ruissé et sus l’dout.